Agusan Sur athletes nangandam na sa Palarong Pambansa
PROBINSIYA SA AGUSAN DEL SUR -- Nagkatigom sa usa ka misa sa St. Vincent Parish Church sa Patin-ay, Prosperidad, Agusan del Sur ang delegasyon sa Caraga region para sa Palarong Pambansa 2024 niadtong Hunyo 27.
Gisunod ang send-off ceremony sa mga atleta ug coaches nga mobyahe padulong sa Cebu City kadtong Hunyo 29 para sa annual multi-sporting event.
Sa mensahe ni Agusan del Sur Gov. Santiago Cane Jr., giaghat niini ang mga atleta nga magkahiusa isip delegado sa Caraga bisan pa man og naggikan sila sa nagkalainlaing probinsya sa rehiyon.
“We will go to Cebu as one Caraga. Ipakita nato sa Palarong Pambasa nga solid ta,” pamahayag ni Gov. Cane.
“Do not be disheartened kung naa pay mas mayo sa inyoha didto. Just give your best and give your all,” dugang sa gobernador.
Mapasalamaton usab si Department of Education (DepEd) Caraga Director Maria Ines Asuncion sa mga local chief executives sa rehiyon, mga ginikanan, ug stakeholders nga nisuporta sa mga atleta sa paghatag sa ilahang panginahanglan sa gihimo nga mga pagbansay sa mga atleta.
Nahimo nga venue ang D.O. Plaza Sports Complex sa probinsya sa in-house training sa pipila ka mga atleta sugod sa bulan sa Hunyo.
Ipahigayon ang national sports competition sa Cebu City sa Hulyo 9-16, 2024. (PPIO Agusan del Sur/PIA-Agusan del Sur)
