Agusan Norte coop nakadawat ug P1.5M ekipo gikan sa DAR
DAKBAYAN SA BUTUAN -- Ang Department of Agrarian Reform (DAR) sa Agusan del Norte midunol og walo ka portable abaca stripping machines ilawom sa programang Climate Resilient Farm Productivity Support Project (DAR-CRFPSP) nga nagkantidad sa P1.5 milyones kaniadtong Mayo 27 sa Santiago, Agusan del Norte.
Kini nga kaugmaran namugna sa tumong madugangan ang produksiyon sa abaca fiber ug mapausbaw ang kita sa mga mag-uuma sa abaca sa Sitio Cadahondaonan, Santiago, Agusan del Norte.
Ang mga nakadawat sa proyekto mao ang mga agrarian reform beneficiaries (ARBs) sa nasampit nga dapit diin cila usab membro sa Cadahondahonan Agrarian Reform Beneficiaries Cooperative (CARBC).
Ang CARBC usa ka organisasyon sa mga mag-uuma sa abaca. Sa wala pa matukod ang kooperatiba, usa lamang kini ka yanong organisasyon, diin ang mga miyembro walay igong kapital para sa ilang negosyo. Tungod niining kakulangon, nagsalig sila sa tabang sa gobyerno.
Kaniadtong tuig 2019, nahimo kining kooperatiba pinaagi sa tabang gikan sa DAR Project ConVERGE (Convergence on Value-Chain Enhancement for Enterprise Development) ug diri nagsugod ang paglambo sa kooperatiba ug hinay-hinay nadugangan ang ilang mga miyembro ug panginabuhian.
Dinhi usab nagsugod ang pag-uswag sa pagbalhin sa teknolohiya sa pagtikad sa abaka pinaagi sa project ConVERGE.
Sukad niadto, ang kooperatiba mitubo ug nagpalapad sa ilang hiniusang pakigbisog, dugang luna sa abaca plantation nga direktang nakatampo sa pag-uswag sa produksyon sa abaca fiber.
Pero, ilawom sa ilang pag-uswag, nasuta ang panginahanglan sa dugang nga portable stripping machines aron makagama ug taas nga kalidad nga produksiyon sa abaca.
Dako ang pasalamat ni chairperson Joel Tandugon kay sa katapusan matagaan og katumanan ug maagkon na nila ang ilang gipangandoy.
Pinaagi niini, ang CARBC karon makahimo sa pagdugang sa ilang produksyon ug sa pagpalambo sa kalidad sa ilang fiber.
Matud ni Tandugon, "Kining mga bag-ong makinarya gikan sa DAR-CRFPSP nagtabang kanamo sa pagpalambo sa kalidad sa among fiber aron makapasar sa kalidad sa among pumapalit. Ang kalidad nga fiber makakuha og taas nga presyo."
Sa kasamtangan, ang kooperatiba adunay lain-laing mga Negosyo sama sa consumer store, micro credit, abaca trading, coconut trading, tiger grass broom making, banana trading. (Gil E. Miranda, DA-Agusan del Norte/PIA-Agusan del Norte)
