Barangay Night 2024 sa Agusan Norte, gihiusa ang 170 ka barangay
DAKBAYAN SA BUTUAN -- Human sa State of the Province Address ni Governor Ma. Angelica Rosedell M. Amante, nagpabilin ang mga punong barangay, mga kagawad ug uban pang mga opisyales aron pagtambong sa tinuig nga barangay night.
Ang barangay night pamaagi aron magkahugpong ang mga opisyales sa nagkalaing-laing mga barangay sa tibook probinsiya.
Highlight sa maong gabie ang Zumba contest ug raffle draw. Nakuha ang unang gante sa Zumba sa lungsod sa Santiago ug halos tanan usab barangay ang gipalad nga nakadaug sa raffle sama sa computer set, tv, aircon, ref, speaker og tent, water dispenser, electric fan, rice cooker, chairs og P3,000 og uban pa.
Niadtong gabhiona gipasalamatan ni Gob. Amante ang tanang miyembro sa kabarangayan ug iyang ipaabot nga kung unsa man ugali ang ilang mahimo dinhi sa probinsiya sila gyod ang pundasyon niini.
“Kay kasayod ko nga limitado ra gyod ang inyong pundo. The best foundation of good leadership comes from a leader from the barangay. Mao nga atong pasalamatan ang oportunidad nga nahimo tang leader sa atong barangay og atong ipakita ang maayong buhat nga dili kini nila malimtan kung kita wala na sa panirbisyo. Kay kita man ang leader kita gyod ang dampanan sa atong barangay, dili kay moingon mo nga pribilihiyo ninyo kini. A position is never a privilege, rather it is an opportunity and trust given to us by our people, ug pagsalig sa mga tao sa gobyerno, “ matod pa sa gobernadora sa iyang mensahe.
Gawas sa gobernador mitambong usab sa maong okasyon si Bise Gobernador Enrico R. Corvera, Bokal Dick Victor R. Corvera, Ryan Jade D. Lim, Erwin L. Dano. Inez Rosario A. Amante ug Larry F. Bautista, RTR Mayor Richard P. Daquipil, Nasipit Mayor Roscoe Democrito B. Plaza, Provincial Administrative Officer Elizabeth Marie R. Calo ug Liga President Benjamin D. Lim Jr., ug uban sa iyang mga ABC president sa matag munisipyo.
Ang barangay night ginahimo matag tuig isip pag-ila sa dako ug mahinungdano’ng papel sa mga barangay officials ning probinsiya. (Jessica O. Mellejor, PLGU-Agusan del Norte/PIA-Agusan del Norte)
