Pagtasa sa programang agrikultura, pangisda sa Dinagat Islands, gipahigayon
DINAGAT ISLANDS -- Malampuson ang gipahigayong 1st Collaborative Provincial Agriculture and Fisheries Extension Program (CPAFEP) Assessment niadtong Hunyo 24 didto sa function room sa Brgy. Hall sa Justiniana Edera, San Jose, Dinagat Islands.
Masusihong gituki ang estado sa mga programa og proyekto nga gipa-implementar ilalom sa CPAFEP sa Dinagat Islands sa nagkalain-laing ahensya nga may kalambigitan sa agrikultura og pangisda nga mao ang Department of Agriculture nga gi-representar sa DA-APCO PDI sa pagpanguna ni Rey Frias, ATI Caraga Region XIII, BFAR-PFO-PDI, National Irrigation Administration, og Philippine Coconut Authority.
Gihisgutan usab sa maong aktibidad ang mga programa nga nakahan-ay subay gihapon sa CPAFEP nga ipa-implementar sa probinsya sa mosunod pang katuigan aron sa padayon nga pagpalambo sa industriya sa agrikultura og pagpangisda sa lugar.
Mahinomdoman nga usa na katuig ang milabay sukad sa launching nan Dinagat Islands Agriculture and Fisheries Extension System kun DIAFES nga mao ang bersyon nan CPAFEP nga gibuhat sa Office of the Provincial Agriculturist – Province of Dinagat Islands (OPAG-PDI) og mga kaubanang buhatan sa probinsya nga bunga sa inisyatibo usab ni Gov. Nilo Demerey Jr.
Ug sa unang beses nga pagsusi sa kun diin na dapit ang naabtan niini, mipadayag sa iyang makanunayong suporta ang gobernador sa maong programa aron sa paghupay sa panginabuhian sa mga Dinagatnon food liners ngadto sa kalambuan.
Anaa usab si Provincial Agriculturist Rico Galinato nga mipahayag sa dakong pagpasalamat sa opisina ngadto sa mga ahensya nga mi-tambayayong aron kalampusan sa mga programs, projects and activities (PPAs) nga gipatuman. Gitambungan usab kini sa mga provincial coordinators sa nagkalain-laing banner programs sa OPAg-PDI og municipal agriculture officers sa pito ka munisipyo sa probinsya. (OPAg-PDI/PIA-PDI)
