Dinagat Islands nagsaulog sa 36th National Disaster Resilience Month
DINAGAT ISLANDS - Alang sa pagsaulog sa nasudnong selebrasyon sa ika-36 nga National Disaster Resilience Month 2024, nagkadaiyang mga personahe sa probinsya sa Dinagat Islands ang nakigduyog sa kick-off ceremony pinaagi sa buhatan sa Provincial Disaster Risk Reduction and Management Office sa pagpanguna ni Provincial DRRM Officer Rosario Jra. R. Alon nga gipahigayon niadtong Hulyo 1 didto sa Provincial Capitol Compound, Cuarinta, San Jose, Dinagat Islands.
Aduna kini tema nga “Bantayog ng Katatagan at ang Pagbubuklod sa Layuning Kahandaan.” Ang Executive Order No. 29, series of 2017 nagmando sa pag-obserbar sa National Disaster Resilience Month (NDRM) atol sa Hulyo matag tuig sa tanang Pilipino sa tibuok nasud pinaagi sa pagpahigayon sa mga aktibidad nga may kalabotan sa disaster resilience.
Gipahayag usab niini ang pagbalhin sa focus gikan sa disaster awareness building ngadto sa pagpasiugda sa mahinungdanong disaster resilience activities nga may kalabotan sa abilidad sa mga indibidwal, komunidad, organisasyon, ug estado sa hingpit nga pagpangandam sa mga epekto sa peligrong dala sa katalagman pinaagi sa mga tukmang lakang aron malikay sa disgrasya.
Matod pa ni Department of the Interior and Local Government (DILG) – Province of Dinagat Islands Dir. John Reyl L. Mosquito nga ang mga local government unit gimandoan ubos sa Local Government Code nga protektahan, ampingan, aron masiguro ang kaluwasan sa katawhan nga ginsakpan niini. Kinahanglan nga mangandam sa dili pa (before), sa panahon (during) ug human (after) sa kalamidad. Uban sa dako nga suporta sa lain-laing mga buhatan, sigurohon nga ang komunidad lig-on, og maghiusa uban sa positibo nga kinaiya aron makalingkawas sa kalisod og peligro.
Mipadayag usab sa ilang mga mensahe sila Disability Affairs Officer III Ranita V. Castro ug si District 1 Board Member Carlos Bua atol niini nga okasyon. Anaa usab ang presensya ni ex-officio Board Member Gretchen Ecleo-Ang, Liga ng mga Barangay president, lakip ang mga personahe gikan sa PNP, PCG, BFP, Philippine Army ug uban pa. (PIO-PDI/PIA-Dinagat Islands)
