Adlaw sa probationers, parolees, gisaulog
DAKBAYAN SA BUTUAN -- Gipahigayon kaniadtong Hulyo 19 sa Agusan del Norte Provincial Capitol gymnasium ang joint activity sa Agusan del Norte Parole and Probation Office ug Butuan City PPO ang ika 48th sa pagkamugna sa Parole and Probation Administration ug 30th Parole and Probation Week alang sa mga kliyenteng miyembro niini.
Ana sa 100 ka mga probationers ug parolees ang misalmot sa gipahigayong friendship game o larong pinoy nga gilangkuban gikan sa local government unit sa Buenavista ug syudad sa Butuan. Adunay basketball, Maria went to town, sack race, dama, in and out, ug kadang-kadang.
Alang sa weeklong celebration, una ng nagpahigayon ang mga parolees ug probationers sa lungsod sa Jabonga, Kitcharao, Tubay, Santiago ug syudad sa Cabadbaran og cleanup drive sa palibot sa city hall ug public market, ang Las Nieves, Magallanes ug RTR nanghinlo sa palibot sa Hall of Justice, Libertad ug pagpanghinlo sa shoreline sa sitio Tinago, Barangay Matabao, Buenavista. Gikataho usab nga magpahigayon sila og mangrove planting sa Tagcatong, Carmen ning probinsya nga langkuban sa mga parolees ug probationers sa lungsod sa Nasipit ug Carmen.
Tumong sa maong kalihukan nga mapataas pa ang lebel sa matag usa sa pagsalig sa ilang mga kaugalingon ug katuyoan niini nga mapadayon ang public participation pinaagi sa re-socialization ug re-integration sa mga probationers ug parolees sa katilingban isip usa ka produktibo ug law-abiding citizens sa probinsya.
“Sa mga probationers ug parolees gitagaan kamo og second chance kinahanglan dili kini ninyo sayangan, kinahanglan gamiton sa sakto kay talagsa ra kayo ng matagaan og kahigayunan nga imbes kamo mo serve sa inyong sentence, anaa kamo sa gawas uban ang inyong pamilya ug ako nanghinaot nga mo tulin gyud ang inyong probation ug parole nga ma successfully terminated namo from parole and probation supervision,” matod ni PPA Regional Dir. Lina K. Burdeos.
Mapasalamaton usab si Dante C. Lisondra, chief parole and probation officer sa probinsya sa aktibong suporta sa lokal nga panggamhanan sa Agusan del Norte sa pagpanguna ni Gov. Ma. Angelica Rosedell M. Amante pinaagi sa paghatag niini og financial assistance matag tuig para sa ipahigayong mga skills training ug rehabilitation program sa maong opisina.
Ang maong kalihokan gipangunahan ni PPA Dir. Burdeos ug Lisondra uban sa pakigtimbayayong sa Provincial Social Welfare Development Office (PSWD) pinaagi sa pagpanghatag og bugas. Anaa usab ang pipila ka mga personnel sa matag buhatan. (SD Gomez, PLGU-Agusan del Norte/PIA-Agusan del Norte)
