Deep sea payao, gipadali ang pag-instalar sa Dinagat Islands
SAN JOSE, Dinagat Islands - Agresibo si Gob. Nilo P. Demerey Jr. nga mapadali ang pag-instalar sa unang napulo ka mga “ deep sea payao” ngadto sa natumbok nga pahimutangan o coordinates niini sa kadagatang Pasipiko nga giingong tuna highway nga karun maoy gipahimuslan sa mga pribadong commercial fishing companies.
Mao kini ang nahimong reaksyon sa gobernador human pormal nang gi-presenter sa
mga miyembro sa Task Force Deep Sea Payao (TFDSP) ang nahimong resulta sa unang
misyon niini niadtong nakalabay nga Hulyo 10 – 11, kauban ang mga tinugyanan sa
Philippine Coastguard didto sa kalawrang bahin sa pasipiko nga 45 nautical
miles ang distansya gikan sa lungsod sa Loreto, Dinagat Islands.
Ang komprehensibong presentasyon sa grupo mao ang nag-ingganyo ni Gob. Demerey
nga dayong tawagan ang Mindanao Development Authority (MinDA) alang sa mga
posibling matabang niini para mapadali ang pagproseso sa mga rekisitos sa
nahisgutang proyekto nga gikan sa Bureau of Fisheries and Aquatic Resources
(BFAR).
Gitahasan usab niini ang mga membro TFDSP nga lihukon na ang pagplansa sa mga gikinahanglang dokumento alang sa pag-ila unya sa mga lehitimong benipisyaryong grupo sa mga mananagat nga maoy mudumala og magmentenar sa proyekto. Samtang kauban ang BFAR sa musunod nga mga adlaw han-ayon na mga dokumento usab sa pagpangayo og sakyanang pandagat nga gamiton unya sa pagpangisda nga mao ang tolo ka mga 62 footer tuna handline fishing boat ngadto sa BFAR Central Office.
Tungod niini, dayong gipaabot ni Demerey ang importansya og katuyuan niini nga proyekto ngadto sa mga board members sa 6th Sangguniang Panlalawigan alang sa suporta sa ngalan sa lehislasyon. Sa pagkakaron mashayag na ang katumanan sa mga pangandoy sa gobernador nga palambuon ang natad sa pangisda sa probinsya sa Dinagat Islands. Mahinumduman nga ang pagpalambo sa programa sa pangisda usa sa mga nag-unang prioridad nga nahilakip sa i2FAME strategy (industrialize and innovate fishery, agro-forestry, mining, and ecotourism) para sa pagkab-ot sa Regional Development Plan 2023-2028 nga giduso sa Caraga Regional Development Council (RDC) kinsa ang gobernador mao ang kasamtangang chairperson niini. (Jimmy S. Jara, PIO-PDI/PIA-Dinagat Islands)
