Thursday, 25 July 2024

Solar water system sa Macalang gi-inagurahan, super health center sa Sangay gisugdan

BUENAVISTA, Agusan del Norte -- Giinagurahan niadtong Hulyo 18 ang gipahiluna ni Kongresista Dale B. Corvera nga solar water system sa Macalang, ug gipahigayon usab ang groundbreaking sa iyang gi-endorso kang Sen. Bong Go nga super health center sa Sangay, tanan sa lungsod sa Buenavista, Agusan del Norte.

Ang P10 milyones nga level 11 solar-powered water system sa Macalang maghatag og abunda ug de-kalidad nga potable water sa kapin sa 2,000 ka lumulupyo sa kapin sa 500 ka panimalay sa barangay.

Ang super health center, sa laing bahin, magsilbi unya isip birthing clinic, ginagmay nga operasyon ug regular nga konsultasyon alang sa mga residente sa sangay ug kasikbit niini nga uptown barangays sa Rizal, Guinabsan, Olave ug Simbalan.

Sa ilang mensahe mapasalamaton si Mayor Joselito T. Roble, sila Kapitan Shirley M. Edoc sa Macalang ug Kapitan Noriel G. Ballera sa Sangay ning maong mga proyekto. 

Sumala pa ni Mayor Roble, "Mga bunga kini sa kakugi sa Kongresista pagpangalap og mga proyketo nga mapadangat sa distrito."

Alang kang Kong. Corvera kabahin kini sa iyang mga kaakuhan pagtubag sa mga hangyo sa iyang suporta ug subay sa iyang nakita nga mga panginahanglan pagseguro nga accessible ang gikinahanglang mga serbisyo sa lugar. Subay sa iyang pagtan-aw sa mga panginahanglan ug sunod usab sa mga hangyo nga gipadangat kaniya nga gipadayag sa kongresista nga maninguha siya nga makaangkat og dugang pang mga proyekto sa duha ka barangay ug sa uban pang mga lugar sa probinsya.

Ang nakita ni Corvera nga yawe aron mahimong paspas pa ang pagsulod sa mga proyekto sa mga lungsod ug mga barangay mao ang pagpahugot pa sa kahiusahan ubos sa hiniusang liderato nga anaa ang probinysa karon ubos sa ilang tandem ni Gob. Ma. Angelica Rosedell M. Amante. Kini tungod kay ang mga proyekto sa usa ka lugar nga dili matubag sa lungsod, mahimong akohon sa probinsya ug ang dili matubag sa probinsya mahimong akohon sa Kongreso. (Nicolai De Asis, Harvey Micabalo, PLGU-Agusan del Norte/PIA- Agusan del Norte)