Agusan Norte nakadawat ug emergency communications equipment
DAKBAYAN SA BUTUAN -- Pinaagi sa proyektong gipatuman sa Philippine Disaster Resilience Foundation (PDRF) ubos sa Resilient Emergency Communications for Enhanced Disaster Response kun REACHED, usa ang probinsya sa Agusan del Norte pinaagi sa Provincial Disaster Risk Reduction Management Office ang nakadawat og mga emergency communications equipments niadtong Hulyo 16 nga gipahigayon sa Almont Hotel, Butuan City.
Ang emergency equipment nga nadawat sa probinsya mao ang tag-isa ka starlink access points adapter, satellite phone, base radio, lima ka handheld radios, ug isa usab ka mobile radio.
Lain pang nakadawat niini mao ang Barangay Mandamo, De Oro, ug Anticala ning syudad sa Butuan ug ang buhatan sa City Disaster Risk Reduction Mangaement Office kun CDRRMO.
Nagpahigayon og signing of deed of donation ang matag partido alang sa opisyal nga pagdawat niini.
Mahibaloan nga ang REACHED Project gipundohan sa Australian government nga nagtumong sa paghatag og suporta ngadto sa mga piling local government units (LGUs) sa Pilipinas pinaagi sa paghatag og mga gikinahanglan nga equipment ug mga trainings aron masiguro ang access sa komunikasyon panahon sa mga emerhensiya aron makatabang sa pag-coordinate sa response ug recovery operations sa mga apektadong lugar.
Ang maong seremonya gipangunahan sa Philippine Disaster Resilience Foundation ug gitambungan kini nila ni Bise Gob. Enrico R. Corvera isip representante ni Gob. Ma. Angelica Rosedelle M. Amante, City Mayor Ronnie Vicente Lagnada, Australian Ambassador to the Philippines Hae Kyong Yu, Peter Adams, Counselor Thomas Shannon, Asst. Regional Security Officer, Rene Meily nga presidente sa PDRF.
Anaa usab ang presensya ni Provincial Administrator Elizabeth Marie R. Calo, PDRRMO Chief Erma Suyo uban ang pipila ka mga empleyado sa maong buhatan. (SV Deligero, PLGU-Agusan del Norte/PIA-Agusan del Norte)
