Eskwelahan sa Zapanta Valley sa Agusan del Norte, natukod na
KITCHARAO, Agusan del Norte -- Human sa unom ka bulan gikan pag groundbreaking nga gisaad ni Gob. Ma. Angelica Rosedell M. Amante uban sa Department of Education (DepEd) mahitungod sa pagatukoron nga eskwelahan sa Sitio Zapanta, Barangay Bangayan, Kitcharao Agusan del Norte, gipahigayon na ang inagurasyon sa Zapanta Valley National High School, Jaliobong National High School Annex tungod kay nahuman na ang konstruksyon niini.
Ang maong eskwelahan, usa ka unit nga gilangkuban sa lima ka classroom para sa mga batang mo-enroll gikan sa Grade 7 hangtud Grade 10.
Ang maong inagurasyon nga gipasiugdahan ni Gob. Amante nagtumong nga mahatag ang igong serbisyo ug programa sa kalamboan sa edukasyon sa maong lugar ug mahatag ang komportable nga tulonghaan.
Mahibaloan nga ang pagtukod niini gipundohan sa lokal nga panggamhanan og lima P5 milyon para sa mga panginahanglanon nga materyales sa pagtukod sa maong imprastraktura. Mihatag usab ang buhatan sa DepEd Agusan del Norte sa presensya ni Schools Division Superintendent Jeanie L. Mativo, sa mga gikinahanglang gamit sulod sa eskwelahan sama sa mga bangko, blackboard ug apil ang pagbutang og mga mangtutudlo.
Ang 29th Infantry Matatag Battalion ug ang 544th Engineer Construction (PIONEERS) Battalion maoy nangunay usab sa konstruksyon sa maong eskwelahan.
Nahimong posible ang proyekto pinaagi sa pagtinabangay sa technical planning working group (TPWG) sa army engineers, infantry units, local government units, ug DepEd uban sa pakighiusa sa mga indigenous peoples (IP) community alang sa katumanan niini.
Anaa usab ang mga partner agencies sama sa Department of Agriculture nga mihatag og hydrophonic materials nga maoy gamiton sa mga seedlings para sa pagpananom ubos sa programang ‘Gulayan Sa Paaralan.”
Ang Safe School Philippines nanghatag usab ug mga school supplies, bags, ug hygiene kit sama sa toothbrush ug toothpaste, apil man ang First Gen Hydro Corporation nga mihatag og bags ug school supplies para sa mga bata’ng naa sa elementarya, Ang ANTRECCO mihatag og semento para sa pag koral apil na pintal.
Nagbaton usab og ceremonial turnover sa mga services alang sa legal nga pagpanghatag sa mga gamit. Sa maong adlawa usab gi-deklarar ni Mativo ang 2024 Brigada Eskwela.
Ang maong proyekto usab gisuportahan sa LGU sa Kitcharao sa pagpanguna ni Municipal Mayor Jenry E. Montante, Joseph V. Cenones, punong barangay sa Bangayan, 901st Brigade, 52nd Engineering Brigade, Battalion Commander sa 29IB, 544th Engineering, ug Philippine National Police - Agusan del Norte. (SD Gomez, PLGU-Agusan del Norte/PIA-Agusan del Norte)
