Mga residente sa 5 ka barangay sa Kitcharao, nakadawat ug libreng serbisyo
DAKBAYAN SA BUTUAN -- Dakong kalipay ug pagpasalamat ang nasinati sa mga taga-barangay Jaliobong, Canaway, Bangayan, San Isidro ug Barangay San Roque sa lungsod sa Kitcharao, Agusan del Norte sa pagbisita ni Gobernador Ma. Angelica Rosedelle M. Amante, Bise Gobernador Enrico R. Corvera uban ang pipila ka mga board members sa probinsya, ug nagkalain-laing ahensya sa gobyerno tungod sa wala pagpakyas sa gobernador sa iyang gisaad nga tanan mga barangay o munisipyo sa probinsya apuron gayod sa mga libreng serbisyo.
Natagamtaman na niini ang libreng konsultasyon, tambal sa mga komon nga balatian sama sa hilanat, ubo, sip-on, ibot ngipon, libreng tuli, hilot, tupi, pagpadangat og mga legal services, first aid demonstration, ug daghan pang uban.
Ang maong kalihukan gipahigayon sa Jaliobong Elementary school, Kitcharao, Agusan del Nrote.
Sa makanunayon, si Mayor Jenry Montante Nagpaabot sa iyang dako nga pasalamat sa tanang mihimo sa ilang sakripisyo aron lang makatagamtam ang mga katawhang Kitcharaonon sa talagsaong serbisyo. (PLGU-Agusan del Norte/PIA-Agusan del Norte)
