Babaeng May Itlog sa Dinagat Islands, padayon ang pagtabang sa women’s association
DINAGAT ISLANDS - Nagmalampuson nga gipahigayon ang pagpanghatag ug egg production livelihood package sa programang ‘Babaeng May Itlog,’diin gipang-apud-apod ngadto sa lima ka mga women's association ang mga libreng ready-to-lay chicken ug feeds niadtong Oktubre 10, diin personal kining gitunol pinaagi sa buhatan sa Provincial Veterinary Office (PVO) sa pagpanguna ni Provicial Veterinarian Aimee A. Jimeno.
Agi'g pagpalig-on sa programang Remedy sa Panginabuhian, usa sa mga prayoridad niini nga mahatagan og saktong kabuhayan ang mga kababayinhan sa probinsya sa Dinagat Islands pinaagi sa programang Babaeng May Itlog nga gipangunahan sa provincial government ubos sa pagdumala ni Governor Nilo P. Demerey Jr., MPM.
Ang lima ka mga asosasyon mao ang Helene Women's Association, Liberty Women's Association sa lungsod sa Loreto nga gipangulohan nila Dorothy Caraan ug Melvin C. OpeΓ±al; San Vicente Women's Association sa lungsod sa Tubajon; Group of Women's Active Farmers' Associatio sa lungsod sa Libjo; ug ang Cayetano Women's Association sa lungsod Dinagat nga gipangulohan ni Lurvien Atuel, diin matag asosasyon nakadawat og livelihood package nga 300 heads layer chicken ug 18 bags of feeds.
Anaa sa maong kalihukan si Security Officer IV Nilo Marco M. Demerey isip representanti ni Gov Demerey nga matod pa niini nga door-to-door nilang gihatod ngadto sa mga lumulupyo ang mga serbisyo sa gobyerno alang sa dugang panginabuhian ilabina sa mga kababayinhan.
Atol sa maong kalihukan, anaa ang presensya nila Vice Mayor Petnel Sombrado, Municipal Agriculturist, barangay LGUs, personahe sa Remedy Action Center (RAC) ug mga miyembro sa mga asosasyon. (Lorense Mae Nidea, PIO-PDI/PIA-Dinagat Islands)
