RTR sa Agusan Norte gibubu-an ug pundo alang sa rice production
File photo
DAKBAYAN SA BUTUAN -- Aron mas mapalambo pa ang sektora sa agrikultura sa probinsya sa Agusan del Norte, dako nga pundo ang gigahin niini sa lungsod sa RTR isip suporta sa implementasyon sa rice production support project.
Kini ang unod sa unom ka mga resolusyon nga gipalabang sa Sangguniang Panlalawigan (SP) diin naghatag pagtugot kang Governor Ma. Angelica Rosedell M. Angel Amante alang sa pagpirma sa mga memorandum of agreements tali sa probinsya sa Agusan del Norte ug sa unom ka mga farmer associations sa lungsod sa RTR.
Ang mga asosasyon gilangkuban mao ang Poblacion 1 Farmers Association diin gigahinan og P1,000,000; Panaytayon Farmers Association sa kantidad nga P1,500,000; Basilisa Farmers Association nga nagkandidad og P3,000,000; Poblacion 2 Farmers Association balor P1,500,000; Balangbalang Farmers Association sa kantidad nga P1,500,000; ug Humilog Farmers Association nga nagkantidad og P1,500,000.
Sumala sa kasabutan, ang nasangpit nga kantidad gamiton para sa proyekto nga ipa-agi og loan ngadto sa farmer-beneficiary association sulod sa 10 ka tuig diin walay interest ug ang pagbayad sa P300,000 matag tuig magsugod lamang sa ika-6 nga tuig hangtod nga ang tibuok kantidad mabayran sa ika-10 nga tuig.
Pinaagi sa pagpangamahan ni Bokal Erwin L. Dano, tsirman sa Committee on Agriculture and Agrarian Reform, kauban sila SP members Rodulfo A. Pitogo ug Francisco Y. Chan Jr., gipalapang kini atol sa ika-101 nga regular sesyon sa SP. (RJSE, PLGU-Agusan del Norte/PIA-Agusan del Norte)
