Longevity service incentive para sa child dev’t workers sa Buenavista
DAKBAYAN SA BUTUAN -- Aprobado na sa Sanguniang Panlalawigan ang Municipal Ordinance No. 0020-2024 gikan sa Sanguniang Bayan sa Buenavista, Agusan del Norte nga mag establisar og Longevity Service Incentive Awards para sa mga child development workers (CDW) basi sa mga tuig sa ilang serbisyo sa munisipyo.
Ang local government unit sa Buenavista nagtumong sa pagdasig ug pagganti sa dedikasyon ug kakugi sa CDWs pinaagi sa usa ka structured incentive program, pagdasig sa kabag-ohan ug padayon nga pasalig sa CDWs. Tungod niini gimugna sa local nga panggamhanan sa lungsod sa Buenavista ang Longevity Service Incentive Awards para sa CDWs.
Subay sa maong ordinansa makadawat og P1,000.00 ang CDW nga 5 na ka tuig nag serbisyo; P3,000 sa 5-10 ka tuig; P5,000 sa 11-15 ka tuig; P10,000 sa 16-20 ka tuig; ug P15,000 sa 20 ka tuig pataas.
Aron mahimong kwalipikado alang sa maong awards, ang usa ka CDW kinahanglan nga rehistrado ug aktibong miyembro nga trabahante sa CDW sa munisipyo, nag serbisyo isip CDW alang sa minimum nga gikinahanglan nga mga tuig sa serbisyo nga gitakda sa Section 5 sa maong ordinansa ug certified sa MSWDO nga gipatuman pinaagi sa affidavit, walay pending nga Administrative o criminal charges nga ebidensya sa NBI clearance, ug magpakita sa satisfactory performance sa ilang mga katungdanan.
Kini gi aprobahan sa Sanggunian Panlalawigan pinaagi sa Sangunian Resolution No. 458-2024 atol sa ika 104 Sesyon Regular sa pagpaningkamot ni Bokal Rodulfo A. Pitugo tsirman sa Committee on Human Resource Development, Labor and Employment inabagan nila Sangguniang Panlalawigan members Dick Victor B. Carmona ug Larry F. Bautista kaniadtong Octobre 15. (Ramil L. Pasco, PLGU Agusan del Norte/PIA-Agusan del Norte)
