Kapin 350 Las Nievesnon, nakaangkon ug libreng serbisyo
LAS NIEVES, Agusan del Norte -- Kapin 350 ka mga taga Brgy. Durian, Las Nieves ang nakaangkon ug libreng serbisyo gikan sa Lokal nga Panggamhanan sa Las Nieves sa gipahigayon nga Las Nieves Cares Community Immersion Serbisyo Caravan (Lanie Cares) 2024.
Ang Lanie Cares 2024 adunay upat ka hugna nga ipahigayon sulod sa bulan sa Nobyembre ug una niini mao ang taga Barangay Durian.
Ang Lanie Cares usa ka programa sa Municipal Peace and Order Council sa Las Nieves. Pinasikad kini sa Executive Order No. 70, Series of 2018 nga nagmando sa pagpatuman sa Whole of Nation Approach aron wagtangon ang local communist armed conflict.
Ang maong mga Barangay nagpabilin nga insurgency-free bunga sa pagtinabangay sa lokal nga panggamhanan sa Las Nieves ug sa 23rd Infantry “Masigasig” Battalion (23IB), Philippine Army.
Mitambong si Mayor Karen S. Rosales sa
pagpahigayon sa serbisyo caravan sa maong barangay para ipakita ang iyang hugot
nga suporta sa katawhan. Kauban niya nga mitambong sa maong programa ang mga
miyembro sa 19th Sangguniang Bayan nga sila Hon. Avelina S. Rosales, Hon.
Florante G. Largo, Hon. Alberto R. Japitana, ug Hon. Jacinto T. Fabro.
“Kani among paningkamot para kini sa inyo mga katawhan sa Las Nieves. Nanghinaot ako nga padayon na gyud nga mawagtang sa atong lugar ang walhong grupo pinaahi sa atong pagtinabangay.” Sumala kang Mayor Karen Rosales.
Dugang pa ni Mayor Karen, gusto niya nga walay mabiyaan nga barangay sa lungsod ug ang tanan makaangkon gayud sa serbisyo sa gobyerno.
Gidayeg ug gipasalamatan usab sa Mayor ang suporta sa mga lokal nga opisyales sa Barangay Durian ngadto sa mga programa ug serbisyo sa panggamhanan.
Ang serbisyo caravan nagdala og mga serbisyo nga gipahigayon sa nagkadaiyang ahensya sa panggamhanan ug pribadong sektor.
Ang Rural Health Unit sa Las Nieves, ubos sa pagdumala ni Doc. Rose Marie Ruelan, nagpahigayon og libreng health check-up, dental check-up, pre-natal, tuli, laboratory services, ug pagpanghatag ug tambal. Kauban usab sa maong programa ang pipila ka personahe sa PhilHealth.
Kauban usab nila si Doc. Joseph Lawrence Jamora ug mga kaubanan sa A. Jamora Optical Clinic nga mipahigayon sa libreng check-up sa mata ug pagpanghatag og antyohos.
Miserbisyo usab ang Legal team sa
Public Attorney’s Office-Cabadbaran City Branch nga gipangunahan ni Attorney
Hector Christopher M. Salise Jr., kauban si Atty. Jed Yecyec.
Mipahigayon usab og libreng gupit ang Charlie Company, sa 23rd IB nga giuluhan ni Captain Bench Kevin C Ormilla.
Anaa usab ang Local Civil Registrar nga mi facilitate sa mga mi-apply para sa birth certificate registration ug pagpakasal, samtang nanghatag usab ang Assessor's Office og mga flyers isip parte sa ilang Information Education Campaign inabagan sa Municipal Treasurer's Office nga nagdawat usab ug bayad sa tax.
Naa usab ang Department of Trade and Industry nga mitabang sa mga mi process sa ilang business permits. Ang Las Nieves Municipal Police Station naghatag usab ug libreng Police Clearance para sa mga 1st time job seekers sa maong lugar. Aduna usab tig-lima ka kilo nga bugas ang gipanghatag sa opisina sa Municipal Social Welfare and Development ngta gipangulohan ni Elde Japos Jr. Kalakip sa ilang serbisyo mao ang pagreniew sa ID sa mga Senior Citizens ug PWDs. Nagpahigayon usab ug CPR Demonstration ang opisina sa Municipal Disaster and Risk Reduction (MDRRMO) nga gipanguluhan ni Jover Manliguez, EnP.
Nabusog usab ang mga bata sa gipahigayon nga feeding program sa Durian Elementary School. Nalipay usab sila sa mga butas nga gihatag kanila.
Misuporta usab ang Bureau of Fire Protection-Las Nieves nga giuluhan ni Municipal Fire Marshall SFO4 Ariel Goloran nga nagpahigayon ug libreng fire safety seminar para sa mga welders ug nagtudlo unsaon pag gamit sa fire extinguisher. Ang Las Nieves Municipal Police Station naghatag usab ug libreng Police Clearance para sa mga 1st time job seekers sa maong lugar. Mitambong usab sa maong program ang PNP Gorilla Company nga inuluhan ni PLt Jhan Lay P Apostol.
Ang Las Nieves Cares Community Immersion-Serbisyo Caravan 2024 magapadayon hangtod sa katapusang semana sa Nobyembre. Nakatakda nga ipahigayon ang ika-duha nga hugna niini sa Barangay Casiklan karong November 19, 2024. (MIO Las Nieves, Agusan del Norte/PIA Agusan del Norte)
