Ekonomiya sa Dinagat Islands, nisaka og 5.3% sa tuig 2023
DINAGAT ISLANDS – Adunay pagsaka sa ekonomiya sa probinsya sa Dinagat Islands sa tuig 2023.
Mao kini ang gibutyag sa Philippine Statistics Authority (PSA) Dinagat Islands atol sa gipahigayun nga Provincial Product Account (PPA) Dissemination Forum, inubanan sa Provincial Planning and Development Office nga gipangunahan ni PPD Coordinator Jorge C. Daligdig niadtong Disyembre 5 didto sa PEOC function hall, Brgy. Sta. Cruz, San Jose, ning probinsya.
Ang PPA usa ka mekanismo arun makuha ang gross domestic product (GDP) sa mga probinsya diin basi sa datos ang ekonomiya sa Dinagat Islands mitubo og 5.3 porsiyento sa tuig 2023, rebound gikan sa 4.3 porsiyento nga pagkunhod niadtong 2022 diin ang GDP sa probinsiya gibanabana nga anaa sa P12.64 bilyon.
Matud pa ni Villuz C. Orozco, supervising statistical specialist sa PSA – Dinagat Islands nga sa ilang datos para sa 2023, nisaka ang GDP sa probinsya nga nagkantidad og P12.64 bilyon kun itandi sa P12 bilyon sa tuig 2022, ug dugang pa niini nga aduna’y 3.7 porsiyento nga total share sa GDP ang probinsya sa Dinagat sa intero Caraga region.
Basi sa gi-presentar nga datos sa share of major industries, ang Industry sa probinsya naka-record og 52.1 porsiyento, ang Services anaa sa 42.7 porsiyento, samtang ang porsyento sa Agriculture, Forestry and Fishing (AFF) anaa sa 5.1.
Para sa top 3 contributors nga adunay dakong kabahin sa GDP sa probinsya, nag-una ang Mining and Quarrying nga anaa pontos nga 2.0 porsiyento; ika-duha ang Public Administration and Defense, ug Compulsory Social Security nga anaay puntos na 0.9 porsiyento; ug ang ika-tulo ang Transportation and Storage nga aduna’y 0.7 puntos nga porsiyento.
Samtang para sa top 3 fastest growing industries, nakakuha og 36.9 porsiyento ang Other Services, 14.1 porsiyento ang Electricity, Steam, Water, and Waste Management, ug 12.9 porsiyento ang Public Administration and Defense, ug Compulsory Social Security.
Sa katapusan gipasabot sa opisyal nga anindot ang kinatibuk-ang ekonomiya sa Dinagat Islands gani ikatulo kini sa intero sa rehiyon Caraga nga aduna’y taas nga growth rate og nalabwan pa niini ang GDP sa probinsya sa Surigao Del Sur, Agusan Del Norte ug Agusan Del Sur, diin nanguna ang Surigao Del Norte ug ikaduha ang syudad sa Butuan.
Ang maong PPA Dissemination Forum gisaksihan mismo ni Judale W. Quianio ug Myron Mae M. Borromeo gikan sa PSA-Central Office, representative gikan sa Congressional Office sa Dinagat Islands, Provincial Planning and Development Coordinator Jorge C. Daligdig, mga municipal planning and development coordinator ug BPLO gikan sa pito ka lungsod ning probinsya, stakeholders, Board Member Gwendolyn Ecleo-Pols, national line agencies, empleyado sa PSA – Dinagat Islands, ug mga representante gikan sa matag opisina sa kapitolyo. (Alrose Pis-o, PIO PDI/PIA-Dinagat Islands)