Las Nieves gidili ang plastic sa eskwelahan
LAS NIEVES, Agusan del Norte -- Strikto nang idili sa lungsod sa Las Nieves, ning lalawigan ang paggamit ug pagbaligya sa pagkaon ug ilimnon nga nakaputos sa plastic cellophane sa tanang eskwelahan pinaagi sa Municipal Ordinance No. 622-2024. Kini nga lakang nagpakita sa seryosong pagpaningkamot sa munisipyo aron mapalambo ang kalikupan ug panglawas sa publiko.
Ang ordinansa nagtinguha nga mapakunhod ang basura, labi na ang plastik, gikan sa mga kalihokan sa eskwelahan, samtang gipasiugda ang responsableng paggamit ug alternatibo nga mga materyales sama sa recyclable ug biodegradable nga packaging. Gihulagway kini isip usa ka dakong kontribusyon sa pagpreserba sa kalikupan ug pagpatuman sa maayong pamatasan sa panglawas alang sa tanang sektor.
Gilangkuban sa maong mando ang tanang pribado ug publikong eskwelahan sa lungsod, gikan sa preparatoryo, elementarya, ug hayskul, hangtod sa tertiary ug mga teknikal nga vocational nga kurso.
Tumong sa maong ordinansa nga makunhod ang basura sa lungsod ug pag awhag sa nga studyante nga mokaon ug healty foods.
Silotan matod pa sa ordinansa ang dili pagsunod niini nga mando.
Kini gi-aprobahan pinaagi sa Sanggunian Resolution No. 490-2024, sa pagpangamahan ni Bokal James T. Reserva tsirman sa Committee on Laws, Human Rights, Ethics and Good Government, kauban sila Bokal Rodulfo A. Pitogo ug Bokal Ryan Jade D. Lim. (Jessica O.Mellejor, PLGU Agusan del Norte/PIA Agusan del Nortr)