Cagdianao sa Dinagat Islands, pasado sa 4th quarter NSED 2024
CAGDIANAO, Dinagat Islands - Malampuson nga gipahigayon ang 4th Quarter Nationwide Simultaneous Earthquake Drill (NSED) 2024 nga gipanguluhan sa Caraga Regional Disaster Risk Reduction and Management Council (RDRRMC) didto sa lungsod sa Cagdianao sa probinsya sa Dinagat Islands isip maoy nahimo nga regional ceremonial site sa rehiyon sa Caraga niadtong Nobyembre 14.
Kini nga aktibidad nagtumong sa pagpataas sa kahibalo ug paghatag kapasidad sa komunidad kung unsaon pag-atubang, pagtubag, ug kaandam sa publiko kung aduna'y makusganon nga hulga sa linog ug tsunami, diin aktibo kini nga gipartisiparan sa mgta lungsoranon ug lumulopyo sa Poblacion bitbit ang ilang mga Emergency Go Bag na aduna'y sulod nga sanina, first aid kit, kwarta, pagkaon, importanteng dokumento, flashlight, rope, banig ug habol.
Aduna'y gi-identify nga tulo ka evacuation sites kini mao Campolangit evacuation site, MRF, lakip na ang evacuation site sa dalan sa Brgy. Poblacion nga mao ang Bantilis.
Gipailawom sa ebalwasyon ang lokal nga panggamhanan aron masusi kung giunsa nila pagpatuman ang standard nga evacuation procedure sama sa duck, cover and hold diin human niini mihatag og pipila ka rekomendasyon ang mga evaluator, sama sa pagbutang og dugang nga mga ekwipo para sa emehensiya ug ang hustong pagpatuman sa mga rescue procedures.
Sa kinatibuk-an, pasado sa 4th Quarter NSED 2024 nga aduna'y rating nga 83.8 % o Very Satisfactory ang nadawat nga pasidungog sa LGU sa Cagdianao sa pagpangulo ni Mayor Marc Adelson D. Longos, diin dako nga pasalamat ang gipaabot sa mayor ngadto sa mga evaluator, Office of the Civil Defense (OCD) Caraga, Caraga RDRRMC, PDRRMC sa pagpangulo ni Rosario Jra. Roxas-Alon, ug tanan mi-asistar ug mipaluyo nga namahimong nagmalampuson ang maong aktibidad.
Anaa sa maong aktibidad isip si RDRRMC OIC-Chairperson Lorene Sia-Catedral, Science Research Specialist II Manolito Tapangan, DILG-PDI LGOO IV Julius De Guzman, Disaster Risk Reduction ang Management Division Chief Aldie Mae Andoy, NSED evaluators gikan sa Philippine Emergency Telecommunication Search and Rescue Action Group, DepEd, DSWD, BFP, ARESCOM, mga personahe gikan sa MDRRM Office Loreto, Agusan Del Sur, personahe gikan sa DOH Caraga, personahe gikan sa MDRRM Office Bunawan, Agusan del Sur, personahe gikan sa National Irrigation Administration, DPWH Butuan City District Engineering Office, ug OCD CARAGA sa pagpanguna ni Capacity Building and Training Section Chief Marc Gil Calang, Board Member Sean Eludo isip representante ni Governor Nilo P. Demerey Jr., MPM, personahe gikan sa PDRRMC-PDI, barangay officials, ug mga department head sa munisipyo sa Cagdianao.
Dakong pasalamat ang gipadayag ni Sia-Catedral ngadto sa provincial government sa Dinagat Islands sa pagpanguna ni Gov. Demerey sa pagtugot nga mamahimong host ang probinsya sa maong aktibidad, ug ngadto sa LGU Cagdianao sa pagpanguna ni Mayor Longos sa pagdawat sa maong challenge isip maoy regional ceremonial site sa gipahigayon nga 4th quarter NSED 2024. (Alrose Emperado Pis-o, PIO-PDI/PIA-Dinagat Islands)
