Benepisyo sa mga day care teacher sa Cabadbaran City, gipatas-an
DAKBAYAN SA BUTUAN -- Gi-aprobahan sa Sangguniang Panlalawigan sa Agusan del Norte bag-ohay pa lamang ang City Ordinance No. 2023-008 gikan sa Sangguniang Panlungsod sa Cabadbaran City nga nag-amendar sa mga benepisyo sa mga day care teacher.
Gikan sa P2,500 gipatas-an niini ngadto sa P3,000 ang honorarium sa mga day care teacher matag buwan, ug mahimong modako pa hangtod sa P5,000 depende sa pondo sa lokal nga kagamhanan (LGU). Dugang pa, gitas-an usab ang ilang year-end cash incentive gikan sa P2,500 ngadto na sa P3,000.
Nakita sa mga magbabaload nga ang pagtaas sa benepisyo alang kanila dili lamang makatabang sa magtutudlo apan usa usab ka pamaagi aron mas mapalambo ang kalidad sa serbisyo.
Ang ordinansa subay sa Republic Act No. 6972 o "Barangay Level Total Development and Protection of Children Act," ug Provincial Ordinance No. 402-2015, nga naghatag og year-end cash incentives alang sa mga day care/child development workers sa Agusan del Norte.
Base sa rekomendasyon sa Committee on Social Welfare, Population and Development diin tsirman si Larry F. Bautista, uban sa mga co-author nga sila Bokal Rodulfo A. Pitogo ug Bokal Inez Rosario A. Amante ang nasangpit nga lakang naaprobahan pinaagi sa Sanggunian Resolution No. 004-2025 atol sa sesyon regular niadtong Enero 7. (PLGU Agusan del Norte/PIA-Agusan del Norte)
