COMELEC checkpoints opisyal nang gipahimutang sa Dinagat Islands
SAN JOSE, Dinagat Islands -- Opisyal nang gipahimutang niadtong Enero 12 sa Commission on Elections (COMELEC) ang mga checkpoints sa nagdaiyang dapit sa probinsya sa Dinagat Islands isip kabahin sa mga epiktibong lakang alang sa malinawon ug hapsay nga National and Local Elections 2025.
Uban sa hugot nga kooperasyon sa mga tinugyanan sa kapolisan pinaagi sa Dinagat Islands Police Provincial Office sa pagpangulo ni PCOL Jerome A. Dela Cruz, gilusad ang simpling programa sa may utlanan nga bahin sa national highway tali sa lungsod sa San Jose ug Basilisa Dinagat Islands.
Si Atty. Hazel Ivory Laud- Begyan, provincial election supervisor ang nanguna sa pagbukas sa programa pinaagi sa pakigpulong niini uban sa panawagan sa publiko ilabi na sa mga motorista nga makig-alayon sa gipatuman nga mga checkpoints tungod kay kini alang sa seguridad sa panahon sa eleksyon.
Gidugang ni Atty. Laud- Begyan nga lakip sa mga hugot nga gidili samtang nagbyahi mao ang pagdala sa mga makamatay nga hinaghiban(bladed weapons) ilabi na sa armas de fuego. Samtang sa susamang bahin, gipasigarbohan usab ni Laud-Begyan ang mga kapolisan ilabi na niining panahona sila ang frontliner sa pagpatuman sa kahapsay ug kalinaw.
Sa pakigpulong usab ni PCOL Dela Cruz, giingon niini nga andam na kanunay ang kapulisan alang sa pagpatuman sa mga gikatakdang guidelines sa mga checkpoints, gipanawagan usab niini ang publiko ilabi na sa mga motorista nga likayan ang pagbitbit o pagdala dala sa mga kontrabandos panahon sa ilang pagbyahi aron hapsay og malikayan ang mga kakulian ugaling adunay mga checkpoints. Gikalro usab ni Dela Cruz nga bisan paman niini paningkamutan sa kapulisan nga magpabiling respitado ug kortesiya sa publiko ang ilang operasyon.
Ang COMELEC checkpoints mulungtad kini hangtod sa Hunyo 11, 2025 diin mao ang gitakadang pagtapos sa election period. Lakip sa mga ni alayon niini nga kalihukan mao ang mga tinugyanan sa Philippine Coastguard - Dinagat Islands sa pagpangulo ni ENS June Anthony Q. Bonsubre, Joel Ampit sa 91.5 Radyo Serbato ug buhatan sa Provincial Information Office pinaagi ni Documentation Division Head Wrights Casiano. (Jimmy S. Jara, PIO PDI/PIA-Dinagat Islands)