50g nga shabu nasakmit sa mga awtoridad sa San Francisco, Agusan Sur
SAN FRANCISCO, Agusan del Sur -- Malampusong nakapahigayon og buy-bust operation ang mga awtoridad niadtong Enero 2, 2025, alas 8:59 sa gabii. Kini nagresulta sa pagdakop kang Armando Allera Gumapac, lalaki, single, adunay live-in partner, 38 anyos, ug Marie May Namocatcat Morales, babaye, single, adunay live-in partner, 40 anyos, seller, ug residente sa Visayan Village, Tagum City.
Si Morales usa ka newly-identified street level individual (SLI) pusher. Sa operasyon, nakuha ang 23 ka piraso nga heat-sealed nga transparent nga plastic cellophane nga gituohan nga shabu nga adunay gibanabana nga gibug-aton nga 50 ka gramos nga nagkantidad og P340,000.
Ang operasyon gipangunahan sa San Francisco Municipal Police Station (SFMPS) kauban ang Philippine Drug Enforcement Agency- Agusan del Sur Provincial Office (PDEA-ADSPO) og nahitabo sa Purok 6, Barangay 2, San Francisco, Agusan del Sur. Nadakpan ang mga suspek human makigtransaksyon sa usa ka undercover operative.
"Kini nga operasyon nagpakita sa among lig-on nga dedikasyon aron mawagtang ang ilegal nga droga sa among komunidad," matod ni Officer-in-Charge Milan V. Naz.
"Magpadayon kami sa among paningkamot aron madakpan ug mapanagot ang mga anaa sa likod sa kini nga mga ilegal nga kalihokan," dugang niya. Ang mga suspek anaa na karon sa kustodiya San Francisco MPS ug atubangon ang kaso sa paglapas sa Comprehensive Dangerous Drugs Act of 2002 (RA 9165).
Gi-awhag sa San Francisco MPS ang katawhan nga magpabilin nga alerto ug ipahibalo ang bisan unsang kahina-hinalang kalihokan nga may kalabotan sa ilegal nga droga. Ang kalampusan sa kini nga operasyon usa ka pamatuod sa dedikasyon sa mga awtoridad sa pagpanalipod sa kalinaw ug kaluwasan sa komunidad. (San Francisco Municipal Police Station/PIA-Agusan del Sur)
