Mga information officers sa Dinagat Islands, nagtigum kauban ang PhilHealth
DINAGAT ISLANDS -- Nagtigum ang mga information officers sa lalawigan sa Dinagat Islands kauban ang PhilHealth Caraga nga gipamunuan ni Regional Vice President Michael Gibson C. Hernandez aron hisgutan ang importansya sa pagparehistro sa PhilHealth.
Usa sa mga nag-unang katuyuan sa PhilHealth sa pakigpulong sa mga information officers mao ang hini-usang pag-awhag sa tanang mga Dinagatnon nga magparehistro na sa PhilHealth tungod kay katungod sa matag usa nga makapahimulos sa mga programa ug serbisyo sa maayong panglawas ilalom sa Universal Health Care. Adunay igong pundo ang PhilHealth para sa mga serbisyong medical sa mga membro niini basta mupakita lamang sa ilang kaikag ang mga lokal nga kagamhanan sa probinsya ug mga lungsod sa pagparehistro sa programang PhilHealth Konsulta nga tanyag niini.
Tin-aw nga gipasabot usab ni RVP Hernandez nga sa pagkakaron ang Dinagat Islands ang nga dili syento porsyentong nakapahimulos sa mga benipisyong tanyag sa PhilHealth, tungod kay ubos pa lamang kayo ang PhilHealth membership registration niini diin sumala sa datus nga gibase sa Philippine Statistics Authority anaa pa lamang sa 70 porsyento sa katawhan sa intero probinsya ang nakarehistro sa PhilHealth, ug usa sa mga tinguha niini nga matultulan ang anaa sa 30 porsyentong mga Dinagatnon nga wala pa makaparehistro.
Giklaro niya nga usa sa mga mahinungdanon nga programa sa PhilHealth mao ang Konsulta nga adunay mga tanyag nga nagkadaiyang package services alang sa direct ug indirect contributors nga membro sa PhilHealth, kini nga mga serbisyo naglangkob pananglit sa in-patient and out-patient benefits, Z benefits for cancer patients, no co-payment/no balance billing, AIDS/HIV package, animal bite care package, ug uban pang pakete nga sakop sa Sustainable Development Goals.
Ang PhilHealth Konsulta may dakong benepisyo usab sa mga local government units diin pinaagi niini pweding mas mapa-uswag pa ang serbisyo sa mga health facilities ilabi na ang mga gikinahanglang kahimanan para sa mga pasyente, tungod kay pinaagi niini nga programa, adunay pundong gahin ang PhilHealth Konsulta sa mga health facilities nga mamahimong akreditado niini.
Dinhi sa lalawigan sa Dinagat Islands may tulo ka mga health facilities ang akreditado sa PhilHealth Konsulta mao ang Loreto District Hospital, Dinagat District Hospital ug ang Cagdianao Rural Health Unit , hinuon giingon ni Dinagat Islands PhilHealth Provincial Director Ybarra Royrino A. Colima Jr. nga nagpadayon na sa karun sa pagproseso sa ilang mga dokumento ang uban pang mga health facilities sama sa San Jse Rural Health Unit, ug ang usa ka pribadong pasilidad nga JMD Diagnostics.
Ang mga information officers nga mitambong niini nga panagtigum mao sila Tubajon Information Officer Jeff Crisostomo, San Jose Information Officer Jurry Mancia, Cagdianao Information Officer Adonis Lucero, Loreto Information Officer Jing Pelismino, apil man si Jimmy S. Jara sa Provincial Information Office ning probinsya.
Gipanawagan sa PhilHealth nga mubisita lamang sa ilang buhatan nga nahimutang sa P6 Barangay Wilson, San Jose, Dinagat Islands kay andam kanunay ang mga personahe niini nga mo-assister sa mga Dinagatnon nga buot magparehistro sa PhilHealth. (Jimmy S. Jara, PIO PDI/PIA Dinagat Islands)
